Lidhja Demokratike e Kosovës, ka reaguar lidhur me Ditën e Lirisë së Shtypit, dhe pasi që Kosova e ka shënuar rënien më të madhe në 15 vjetët e fundit në indeksin vjetor për lirinë e shtypit të organizatës Reporterët pa Kufij, duke u renditur në vendin e 99-të në botë nga 180 shtete.
Nga kjo parti, është deklaruar se Dita Botërore e Lirisë së Shtypit e gjen Kosovën me rezultat shqetësues dhe se ky vit, është viti i dytë që radhazi Kosova pëson rënie në këtë indeks,
‘‘Dita Botërore e Lirisë së Shtypit, e gjen Kosovën me rezultat jashtëzakonisht shqetësues, sa i përket lirisë së medias- pushtetit të katërt. Kosova, sipas Indeksit të Lirisë së Shtypit nga Reporterët pa Kufij(RSF), ka shënuar rënien më të madhe në 15 vitet e fundit të saj, duke u renditur në pozitën e 99-të nga 180 vende të vlerësuara, më së keqi në gjithë rajonin, një tregues alarmant i përkeqësimit të mjedisit mediatik në vend. Viti 2025 është viti i dytë radhazi që Kosova pëson rënie në këtë indeks, nga vendi i 56-të në vitin 2023, në vendin e 75-të në vitin 2024, përderisa në këtë vit shënoi regresin më të madh, duke u ranguar në vendin e 99-të. Prandaj, raportet e tilla janë dëshmi e qartë e përkeqësimit sistematik të gjendjes së lirisë së medias’’, shkruhet në komunikatën e LDK-së.
Nga LDK është vlerësuar se ky regres lidhet drejtpërdrejt me qasjen e qeverisë Kurti ndaj mediave, pushtet i cili ‘‘ka sulmuar gazetarët, denigruar mediat kritike si dhe tentuar të heshtin fjalën e lirë’’.
‘‘Lidhja Demokratike e Kosovës vlerëson se ky regres, lidhet drejtpërdrejt me qasjen e Qeverisë Kurti ndaj mediave, pasi për katër vite qeverisje, ky pushtet ka sulmuar gazetarët, denigruar mediat kritike si dhe tentuar të heshtin fjalën e lirë. Liria e mediave është gurthemeli i një demokracie funksionale; kur gazetarët censurohen ose frikësohen, qytetarët privohen nga e drejta për t’u informuar, ndërsa abuzimet e pushtetit mbeten në hije’’, është deklaruar nga LDK.
Më tej, kjo parti ka thënë edhe se demokracia s’mund të mbijetojë aty ku mungon liria e shtypit dhe se, LDK do të vazhdojë të ngrejë zërin kundër çdo retorike përçarëse.
‘‘Demokracia nuk mund të mbijetojë aty ku mungon liria e shtypit, prandaj kjo rënie drastike në indeksin ndërkombëtar është alarm për gjendjen e demokracisë në vend. Lidhja Demokratike e Kosovës do të vazhdojë të ngrejë zërin kundër çdo retorike përçarëse apo veprimi arbitrar që cenon mediat e pavarura. Ne jemi të vendosur të veprojmë si gardianë të lirisë së shprehjes, do të punojmë shumë që në qeverisjen e ardhshme të ketë respekt të plotë për mediat e lira, institucione të pavarura dhe llogaridhënie demokratike’’, është shtuar në komunikatë.
Në fund, LDK ka shprehur mirënjohje dhe falënderim për përkushtimin e gazetarëve.
‘‘LDK është mirënjohëse dhe falënderuese për përkushtimin e gazetarëve që edhe përkundër presioneve e kërcënimeve, vazhdojnë të palëkundur të mbajnë të informuar publikun, hulumtojnë dhe të thonë të vërtetën’’, përfundohet në komunikatë.