Anëtarët e Komisionit Qendror të Zgjedhjeve nuk kanë miratuar rekomandimin e sekretariatit të KQZ-së për hapjen e 177 kutive të votimit nga diaspora.
Me katër vota për dhe tri abstenime u refuzua rekomandimi i sekretariatit.
Kryetari i KQZ-së, Kreshnik Radoiniqi bëri të ditur se vendimi i PZAP-së për 21 fletëvotime është i zbatueshëm.
“Vendimi i PZAP-së ka të bëjë me 21 fletëvotimeve që i ka shpallë të vlefshme. Rekomandimi i sekretariatit ka ardh si rezultat i stafit të PAZP-së kur ka ardh mi shiku ato fletëvotime ka has në shumë fletëvotime të njëjta dhe si pasojë e atij procesi sekretariati ka ardhur me nëj rekomandim që edhe ato fletëvotime të shpallen të vlefshme meqenëse gabimisht janë shpall të pavlefshme. Rekomandimi nuk kaloi, vendimi i PZAP-së për 21 fletëvotime është i zbatueshëm”, tha Radoiniqi.
Besnik Buzhala nga sekretariati i KQZ-së, rekomandoi hapjen e 177 kutive të votimit përmes postës me qëllim të vlerësimit të fletëvotimeve që janë shpall të pavlefshme.
“Bëhet fjalë për 1631 fletëvotime të pavlefshme, ku këto përfshijnë gjithsejtë 177 vendvotime nga 187 gjithsejtë. Pra nga 177 vendvotime që përmbajnë fletëvotime të pavlefshme, të zbrazëta dhe të pa përdorura, prej 1-10 fletëvotime përfshijnë 117 vendvotime, prej 11-20 përfshijnë 56 vendvotime, 21-25 fletëvotime të pavlefshme përfshijnë 4 vendvotime. Të hapen këto 177 kuti të votimit në mënyrë që të vlerësohen fletëvotimet e pavlefshme në bazë të vendimit që ka marrë PZAP”, tha Buzhala.