Kryetari i Unionit të Shqiptarëve Veteranë të Kroacisë, Esat Çollaku, bashkë me ekipin e tij, ka vizituar sot Prekazin për të nderuar Epopenë e UÇK-së.
Gjatë vizitës, Çollaku theksoi rëndësinë e kujtimit të heronjve dhe martirëve të luftës për çlirimin e Kosovës, duke shtuar se çdo vit vijmë për të përkulur kokën para sakrificave të familjes Jashari dhe të gjithë atyre që dhanë jetën për lirinë e Kosovës.
“Natyrisht unë jam qytetarë nderi i qytetit të Skenderajt, dhe jam pjesëtar i UÇK-së, por jetojë në Kroaci. Çdo vit vijmë që t’i përkulemi të gjithë këtyre heronjve dhe martirëve, sepse të gjithë qytetarët të cilët nuk e bëjnë një veprim të tillë nuk e duan të mirën e Kosovës. Sot ne duhet të jemi krenar kur i shikojmë të gjithë fëmijët këtu të cilët vijnë dhe përkulen, qëllimi kryesor është të mos harrohet në kujtesën e historisë sonë duhet të shkruhet me shkronja të arta gjithmonë”, deklaroi Çollaku.
Çollaku u shpreh se madhështia e një populli duket kur i kujton heronjtë e tij dhe kjo duhet të ndodhë çdo ditë, në shkolla dhe libra.
“Kjo vepër madhështore e familjes Jashari dhe UCK-së, kujtimet e tilla të cilat dhanë të gjithë anëtarët e vet për çlirimin e Kosovës, po më duhet se është zbehur, andaj kemi obligim moral dhe njerëzor që sa herë ta kujtojmë marsin dhe familjen Jashari dhe të gjitha ato familje që dhanë shumë për tokën e Kosovës, gjaku ynë i cili nuk do të harrohet kurrë. Madhështia e një populli është kur i kujton heronjtë e vet. Ne këtë duhet ta bëjmë jo vetëm ani, do ta bëjmë 365 ditë, në shkolla, në libra të jetë e preambula e Kushtetutës sonë në të ardhmen me shkronja të arta që çlirimi i Kosovës nuk ka ardhur rastësisht, nuk jemi shtet rasti”, ka thënë Çollaku.