Kryeministri i Kosovës, Albin Kurti, shpërfilli të martën sërish Prokurorinë Speciale. I ftuar të paraqitej me urdhër nga Gjykata Themelore në Prishtinë, për të dëshmuar lidhur me rastin e rezervave shtetërore, Kurtit nuk iu bë vonë. Ai mori rrugën për Gjilan, ku mori pjesë në vendosjen e gurthemelit të një kopshti për fëmijë.
Për refuzimin e Kurtit, kanë folur nga ambasada e Britanisë së Madhe në Prishtinë.
Nga ambasada britanike kanë theksuar se respekti ndaj sundimit të ligjit është tipar thelbësor i demokracisë së Kosovës.
“Respekti për sundimin e ligjit është një tipar thelbësor i demokracisë së Kosovës. Ne i nxisim të interesuarit në këtë rast që të veprojnë në përputhje me Kushtetutën e Kosovës dhe të respektojnë procesin e duhur ligjor dhe të punojnë në interesin më të mirë të vendit”, thuhet mes tjerash në përgjigjen e ambasadës britanike për klanin.
Të martën, kryeministri i ftoi sërish prokurorët që të shkojnë në zyrën e tij dhe akuzoi këtë institucion, se më shumë është i interesuar “të mbushë ballinat e ndonjë portali të oligarkut sesa të sjellë drejtësi”.
“Shtrohet pyetja pse i humb prokuroria tre muaj. Për shkak se është më shumë i interesuar të mbushë ballinat e ndonjë portali të oligarkut sesa të sjellë drejtësi. Kurrë prokuroria e shtetit nuk ka qenë më e lirë për të vepruar. Fatkeqësisht lirinë po e përdorë, po e keqpërdorë për ta luftuar qeverinë dhe jo krimin e korrupsionit.
Së pari asnjëherë nuk kam thënë që nuk do të jap dëshmi ose nëse e refuzoj, kam thënë që jam jo vetëm i gatshëm, por edhe i interesuar që të dëshmoj. Unë i mirëpres prokurorinë e shtetit në Zyrën e Kryeministrit. Jo vetëm si dëshmitar apo edhe të pandehur. Qysh në dhjetor ka qenë e mundur që të kryhet ky intervistim dhe të jepet dëshmia nga ana ime. Nëse prokuroria e ka pasë shumë të rëndësishme dëshminë time ai do të vinte tek ne”.
Kujtojmë se Gjykata Themelore në Prishtinë ka konfirmuar ditë më parë se ka lëshuar urdhër që e obligon Kurtin të japë dëshminë e tij në cilësinë e dëshmitarit, në një rast që ka të bëjë me dyshimet për keqpërdorime me rezervat shtetërore.
Urdhri ka ardhur pasi kryeministri nuk u është përgjigjur dy ftesave që ia ka bërë Prokuroria në muajt e fundit.