Presidentja e Kosovës, Vjosa Osmani, ka dalë në një konferencë të përbashkët me Shefin e NATO-s, Mark Rutte, pas takimit të tyre në Presidencë.
Mes tjerash, ajo ka thënë se Kosova është shteti me sentimentin më pro NATO në glob.
Presidentja ka theksuar se NATO është themeluar mbi vlerat në të cilat qëndron sot edhe vet Kosova.
‘‘Ju falënderoj që keni pranuar ftesën time që ta vizitoni Kosovën, shtetin me sentimentin më pro NATO në glob. Me lejoni të ju uroj mirëseardhje në emër të të gjithë qytetarëve të republikës sonë, qytetarë të cilët do të jenë përjetësisht mirënjohës për kontributin vendimtar të aleancës për lirinë e vendit tonë.
Prandaj populli i Kosovës do të ketë gjithë mirënjohje të thellë për secilin vend aleat dhe për secilin ushtarë që erdhën në mbrojtje të një populli. Përgjatë këtyre 25 viteve së bashku me ju e kemi shndërruar Kosovën në një shembull suksesi dhe në një demokraci që angazhohet për të qenë jo vetëm përfituese e sigurisë edhe kontribuuese e saj.
NATO është themeluar mbi vlerat në të cilat qëndron edhe vet shteti ynë, prandaj synimi ynë për anëtarësim në NATO është një domosdoshmëri strategjike për paqen dhe stabilitetin në rajon dhe të gjithë kontinentin evropian’’, ka thënë ajo.