Cak i hajnave shumë herë kanë qenë dhe vazhdojnë të jenë veturat, të cilat qytetarët nuk po kanë siguri t’i lënë as në oborret e shtëpisë e garazhet e tyre.
Të tilla raste janë shumë të shpeshta dhe ndodhin shpesh edhe në parkingje publike.
Një rast i tillë ka ndodhur së fundmi në fshatin Buzhalë të Suharekës, ku hajnat kanë arritur që të vjedhin një automjet nga oborri i një shtëpie dhe janë larguar pa lënë ndonjë gjurmë.
Burimet brenda Prokurorisë kanë bërë me dije se rastin në Polici e ka denoncuar një i ri, i cili ka deklaruar se i është vjedhur vetura BMW me targa gjermane.
Sipas dëshmisë së tij, vlera e veturës së vjedhur kap shifrën e 25,000 eurove.
Pas denoncimit të rastit, Policia ka dalë në vendin e ngjarjes dhe janë ndërmarrë veprimet e nevojshme.
Në lidhje me rastin, Prokurori i Shtetit ka urdhëruar të iniciohet rasti si “Vjedhje e rëndë”.