Numri i rasteve të dhunës në familje ka marrë përmasa shqetësuese në vendin tonë. Këto ngjarje bëhen edhe më të rënda, kur viktima janë prindërit të cilët përjetojnë dhunë psikike e fizike nga fëmijët e tyre.
Një rast i tillë dhe mjaft i rëndë ka ndodhur dje në fshatin Brestovik në Komunën e Pejës.
Këtë herë, një 36-vjeçar po dyshohet se e ka sulmuar fizikisht nënën e tij të moshuar, disa ditë pasi e mori me dhunë nga spitali ku viktima po trajtohej.
76-vjeçarja u godit në kokë nga i biri dhe për pasojë u rrëzua, duke pësuar kështu lëndime trupore.
Gjithçka dyshohet se ndodhi pas një mosmarrëveshje mes tyre dhe eskaloi në dhunë, por fatmirësisht Policia arriti të intervenojë shpejt dhe i dyshuari u arrestua.
Burimet brenda Prokurorisë kanë bërë me dije se djali i dyshuar është shoqëruar në stacion policor, por nuk është intervistuar pasi ka qenë nën ndikimin e alkoolit.
Ndërsa e moshuara u dërgua sërish në Spitalin e Pejës ku ka qenë e shtrirë para disa ditësh për shkak të gjendjes shëndetësore, por që djali e kishte marrë me forcë dhe e kishte dërguar në shtëpi.
Pas përfundimit të procedurave të nevojshme, Prokurori i Shtetit ka urdhëruar masën e ndalimit policor ndaj të dyshuarit.