Policia e Kosovës gjeti dhe sekuestroi armët e përdorura në vrasjen e së martës në Prishtinë: një kallash, një armë zjarri e tipit TT dhe një armë zjarri Colt.
Policia bëri të ditur se armët ishin fshehur në magjistralen Prishtinë-Mutivodë.
“Vrasje e rëndë në bashkëkkryerje e armëmbajtje pa leje – Rr. “Bajram Kelmendi-Rrustem Hyseni”, Prishtinë / 25.03.2025 – 22:25. Lidhur me rastin e datës së lartcekur Policia e Kosovës ka siguruar informacione se armët e përdorura në kryerjen e veprës penale të lartcekur gjenden të fshehura në magjistralen Prishtinë – Mutivodë. Lidhur me rastin në lokacion kanë dalë njësitë përkatëse policore dhe në konsultim me prokurorin e rastit kanë bërë sekuestrimin e tri armëve të zjarrit: një armë zjarri AK 47, një armë zjarri e tipit TT dhe një armë zjarri COLT. Policia e Kosovës po vazhdon të punojë intensivisht në hetimin dhe ndriçimin e plotë të rastit, si dhe sjelljen para organeve të drejtësisë së personave të dyshuar”, thuhet në raportin 24 orësh të policisë së Kosovës.
Të martën mbrëma nga të shtënat me armë u plagosën dy persona, njëri prej të cilëve vdiq në QKUK.
Sipas policisë, janë dy të dyshuar të cilët kishin hyrë brenda lokalit të maskuar. Ende nuk janë arrestuar.