Super Puna nuk po punon super.
Kështu të paktën thonë pronarët e bizneseve që ankesat i kanë të panumërta e të vazhdueshme.
Super Puna, është platformë punësimi e lansuar më 6 shkurt të 2023-ës nga Qeveria e Kosovës, në kuadër të skemës së Punësimit për të Rinjtë, e cila kishte paraparë punësimin e të rinjve nga mosha 18 deri 29 vjeç, duke ua subvencionuar pagën mujore të punëtorit, bizneseve, në vlerë prej 350 euro për 6 muaj.
Por ndonëse kanë kaluar 2 vjet që nga lansimi i saj, pronarët e bizneseve në mbarë Kosovën, në rrjete sociale vazhdojnë të komentojnë për vonesat dhe mos ekzekutimin e mjeteve financiare nga Ministria e Financave, në kuadër të së cilës funksionon platforma. Por si duket kjo vonesë e subvencionimit të pagave mujore nga qeveria është bërë e pa tolerueshme për dikë tjetër.
Në një nga grupet në Facebook, një komentues anonim tregoi që janë mbledhur disa biznese që nuk janë kompensuar dhe janë duke përgatitur padi.
Përveç ankesave për mos subvencionimin e 6 pagave mujore për punëtorët e rekrutuar nga punëdhënësit përmes super punës, ka të tjerë që kanë telashe edhe që të bien në kontakt me zyrtarët e platformës për të marrë përgjigje rreth paqartësive dhe halleve të tyre.
Kësisoj, qindra biznese kanë mbetur pa përgjigje nga vet platforma që i besuan për të marrë të rinj në punë për periudhën 6 muaj.