36 orë pas gjetjes së trupit të Ilaria Sulës, e cila u masakrua nga i dashuri i saj filipinas, ka dalë rezultati i autopsisë.
Sipas raportimeve të mediave italiane, gjatë një debati me të dashurin e saj, Mark Antony Samson, ky i fundit ka marrë një thikë dhe e ka goditur tri herë 22-vjeçaren, duke i shkaktuar hemorragji të rëndë që e çoi në vdekjen e saj.
Pas krimit, Samson mbajti trupin e studentes shqiptare në apartamentin e tij për 20 orë, duke ngritur dyshime edhe tek prindërit e tij, të cilët mund të ishin bashkëpunëtorë në krim.
Samson e futi trupin e Ilarias në një valixhe dhe e hodhi në një zonë pyjore në Poli, jashtë Romës.
Për disa ditë, ai dërgonte mesazhe nga telefoni i saj dhe bënte postime në rrjetet e saj sociale për të fshirë gjurmët. Megjithatë, pas marrjes në pyetje nga policia, ai pranoi krimin.