Kryetari i Partisë Demokratike të Kosovës (PDK), Memli Krasniqi, ka deklaruar se partia e tij është e gatshme të formojë Qeverinë e re brenda 48 orëve, nëse Albin Kurti dështon në këtë proces.
Ai theksoi se PDK do t’i japë hapësirë Kurtit për ta shfrytëzuar të drejtën kushtetuese, por kërkoi që të mos ketë vonesa në konstituimin e Kuvendit dhe formimin e Qeverisë para datës 30 prill.
“Nëse Kurti dështon, ne për 48 orë i takojmë [pakicat] dhe e kryejmë procesin. Për ne ka qenë e rëndësishme të tregojmë një shembull ndryshe, të respektimit të vendit, ligjeve dhe Kushtetutës”, tha Krasniqi.
Ai i bëri thirrje Kurtit që të mos humbë kohë dhe të veprojë menjëherë pas konstituimit të Kuvendit më 15 prill. “Mos na humb kohë, konstituoje Kuvendin, merre mandatin dhe formo Qeverinë, nëse je i zoti, para 30 prillit”, theksoi ai.