Partia Demokratike e Kosovës, dega në Gjilan, ka bërë një denoncim publik ndaj kryetarit të kësaj komune, Alban Hyseni, duke i bërë thirrje Prokurorisë Themelore në Gjilan që të inicojë procedurën hetimore ndaj Hysenit “lidhur me shkeljet e rënda ligjore të prokurimit dhe të financave publike, përmes keqpërdorimit me tenderët e dhënë, me kontratat e kundërligjshme, me punësimet familjare dhe me abuzimet e shumta financiare”, raporton Periskopi.
Në deklarimin e PDK-së, thuhet se denoncimi ka të bëjë me një tender, të cilin, sipas kësaj partie, i pari i Gjilanit e keqpërdorur.
Aty shtohet se tenderi ka qenë në vlerë prej 500 mijë euro për punësimin e 46 personave në QKMF.
”Mirëpo kryetari i komunës ka shkelur ligjin e prokurimit dhe kontratën me “KOSOVAMED”, duke i kërkuar kësaj kompanie punësimin e 46 personave, kështu duke e tejkaluar gati dyfishin e kontratës”, thuhet mes tjerash në komunikatë.
Njoftimi i plotë:
Denoncim publik ndaj Alban Hysenit i cili keqpërdori tenderin prej 500 mijë euro për punësimin e 46 personave në QKMF, duke shkelur rëndë ligjin e prokurimit dhe kontratën me operatorin ekonomik “KOSOVAMED”
I bëjmë thirrje publike Prokurorisë Themelore në Gjilan që të inicojë procedurën hetimore ndaj kryetarit të komunës A.H. lidhur me shkeljet e rënda ligjore të prokurimit dhe të financave publike, përmes keqpërdorimit me tenderët e dhënë, me kontratat e kundërligjshme, me punësimet familjare dhe me abuzimet e shumta financiare.
Njëri nga rastet eklatante ka të bëjë me këtë tenderë. Komuna e Gjilanit ka shpallur tender për punësimin e mjekëve dhe infermierëve në QKMF dhe kryetari i komunës më datë 24 shtator 2024 e nënshkroi kontratën me operatorin ekonomik “KOSOVAMED” nga Prishtina në vlerë prej 449,683.20 euro. Ky projekt nuk ka qenë fare i planifikuar në buxhetin e komunës për vitin 2024 dhe as në planin vjetor të punës së prokurimit në Gjilan.
Sipas kontratës së këtij tenderi (Aneksi 1) komuna e Gjilanit ka kërkuar punësimin e 28 profesionistëve shëndetësor. Mjekë 20, infermiere 3 dhe në stomatologji 5 të punësuar.
Në nenin 1.3 të kësaj kontrate thuhet se; Derivimi i lejuar nga vlera totale indikative është +/-30%. Nëse urdhër blerjet tejkalojnë sasinë totale indikative ose vlerën totale indikative të kontratës publike kornize (duke perfshirë + tridhjetë perqind (30%), pa marrë parasysh datën origjinale te skadimit te Kontratës Publike Kornize, kontrata do të nderpritet automatikisht. Mosperputhja e lejuar plus/minus tridhjete përqind (30%) vlen edhe për pozicion/artikull, dhe ne rast te arritjes se pragut te lejuar AK nuk mund te beje porosi tjera për atë pozicion/artikull.
Mirëpo kryetari i komunës ka shkelur ligjin e prokurimit dhe kontratën me “KOSOVAMED”, duke i kërkuar kësaj kompanie punësimin e 46 personave, kështu duke e tejkaluar gati dyfishin e kontratës.
Sipas tenderit janë kërkuar të punësohen tri infermiere, mirëpo aktualisht janë të punësuara me tender mbi 19 infermiere, pra është tejkaluar 633% numri i të punësuarve sipas kësaj kontrate. Paashtu shuma e tenderit prej 450 mijë euro ka qenë e planifikuar të shpenzohet për tri vite, e ky buxhet i paplanifikuar po shpenzohet ende u bërë një vit kalendarik.
Përveç shkeljeve ligjore dhe tejkalimit të kontratës, janë punësuar edhe zyrtar tjerë si jurist e kordinator, që nuk kanë qenë fare pjesë e kontratës me operatorin ekonomik. Krejt këto kanë ndodhur për të punësuar familjarët e zyrtarëve të lartë të VV-së dhe menaxhmentit të lartë të QKMF-së. Shumë punësime përmes këtij tenderi janë bërë për të blerë heshtjen e tyre, për shkeljet që janë bërë më herët në konkurset e rregullta të shpallura nga QKMF në Gjilan.
Aktualisht në komunën e Gjilanit janë të punësuar jashtëligjshëm, pa konkurse mbi 130 persona pëmes kontratave në vepër dhe përmes këtij tenderi skandaloz. Me këto abuzime Alban Hyseni po i shpenzon brenda vitit afër një milion euro buxhet të paplanifikuar nga kategoria e mallrave dhe shërbimeve. Për këto keqpërdorime financiare kryetari i komunës duhet të jap llogari para ligjit, e kjo ndodhë kur të veprojë prokuroria e përgjumur e Gjilanit.
PDK do të marr hapa të tjerë nëse edhe pas këtij rasti do të vazhdojë heshtjen e saj Prokuroria Themelore në Gjilan.