Kryetari i PSD-së, Dardan Molliqaj, ka kritikuar kërkesat për heqjen e taksës doganore 10%, për mallrat e ardhura nga ShBA-ja, duke thënë se ato janë të paargumentuara dhe nuk pasqyrojnë një qasje parimore.
Molliqaj shtoi se këto kërkesa duket se kanë për qëllim përfitimin personal dhe lavdërimin e fuqive të mëdha.
“Kërkesat e sotme për heqjen e taksës janë jo parimore dhe pa përmbajtje kritike. Për të mos thënë që ato i karakterizon një qasje që pret raste për të shfrytëzuar, qasje për të bërë lajka ndaj t’madhit, gjithnjë për përfitim vetjak. Kosova duhet kritikuar për politikën e saj të jashtme edhe jo parimore edhe izolacioniste. Por duhet thënë, ky rast flet për kritikuesit më shumë.” – ka thënë ai.
Sipas Molliqajt, taksa është aplikuar gjatë qeverisjes së Thaçit, Mustafës dhe Haradinajt dhe nuk është hequr deri tani.
Ai theksoi gjithashtu se taksa është e aplikueshme për vendet me të cilat Kosova nuk ka marrëveshje të tregtisë së lirë, dhe e konsideroi të pavend lidhjen e kritikave për këtë çështje me politikën e jashtme të Kosovës.
“Taksa doganore 10% është këtu për një kohë të gjatë. Këtë taksë Kosova e ka për secilin vend me të cilin s’ka marrëveshje të tregtisë së lirë. Ka qenë këtu përgjatë qeverisjes Thaçi, Mustafa e Haradinaj. Askush nuk e ka hequr. Nuk besoj madje që lidhur me taksat e vendosura së fundi, problemi i Amerikës ndërlidhet në ndonjë mënyrë me neve. Volumi tregtar i prekur prej kësaj takse është i pallogaritshëm, përndryshe edhe përgjigjen do ta merrnim tjetër.” – ka përfunduar Molliqaj.