Kandidati për deputet nga Koalicioni për Familjen, Selim Pacolli, thotë se qyteti i Mitrovicës në terren është më ndryshe se që ka qenë para katër viteve.
Pacolli pohon se Mitrovica është më e lirë dhe më e sigurt për të gjitha komunitetet, por potencon se nuk është fushatë për partinë qeverisëse.
“Sot, Mitrovica është ndryshe nga ajo e katër viteve më parë. Ne duhet t’i shohim gjërat në rrafshin real. Sot, Mitrovica është më ndryshe, është më e lirë. Sot, Mitrovica është më e sigurt – jo vetëm për komunitetin shqiptar, por edhe për komunitetin serb. Sepse, unë i di shumë deklarata të shqiptarëve, të cilët shprehen se edhe ata kanë qenë në një frikë… Tani unë dua t’i bëj fushatë e as lëvdata, por flas me gjuhën reale, e cila është sot në Mitrovicë”, tha ai.
Kandidati për deputet nga Koalicioni për Familjen thotë se realitetit i Mitrovicës dallon për nga rrafshi ndërkombëtar e politik, ku deklaron se në këtë pikë LVV ka dështuar.
“Unë jam në garë për të marr pushtetin z.Kurtit dhe të tjerëve nëse e pranon qytetari. Mirëpo, kur jemi te Mitrovica është më ndryshe. Duhet të jemi real në këtë pikë. Ku jemi në rrafshin ndërkombëtar dhe politik? Jemi shumë larg. Ne jemi një shtet i sanksionuar. Jemi shtet viktimë, dhe i sanksionuar. Kemi dështuar në rrafshin diplomatik. Veprimet çfarëdo qofshin ato nuk të merreshin njëanshëm, mirëpo të merreshin në harmoni me shtetet mike, me ata të cilët na kanë suportuar deri këtu. Sot, Mitrovica është më ndryshe, por Kosova më keq – në rrafshin e infrastrukturës, në zhvillimin ekonomik, në shëndetësi e në të gjitha sektorët tjerë jemi më keq se që kemi qenë. Mirëpo, te Mitrovica flasim pak më ndryshe”, tha ai.