Pas ndërprerjes së seancës konstituive të Kuvendit të Kosovës, Eugen Cakolli nga Instituti Demokratik i Kosovës (KDI) ka reaguar duke theksuar shqetësimin për situatën e krijuar dhe shkeljet procedurale që kanë shoqëruar këtë proces.
“Pra, ashtu siç ka qenë deri diku e pritur, në mungesë të numrit të nevojshëm të votave pati sërish ndërprerje të seancës konstituive të kuvendit. Por që kësaj here, si ndërprerje u karakterizua nga një shkelje tjetër procedurale, ku kryesuesi i seancës, Dehari, e ndërpreu seancën pa pasur votim formal dhe pa i konsumuar pikat e rendit të ditës, gjë që përbën shkelje proceduriale,” deklaroi Cakolli.
Ai vlerësoi se bllokimi i procesit vjen si pasojë e mosdorëheqjes së kryeministrit dhe ministrave në detyrë të cilët kanë fituar mandat të deputetit, duke i cilësuar këto dorëheqje si obligim ligjor.
“Në anën tjetër, tashmë është e qartë se situata është e bllokuar për shkak të mosofrimit të dorëheqjeve, obligim ligjor ky për kryeministrin dhe 15 ministrat tjerë në detyrë të cilët kanë fituar mandat të deputetit. Ne i bëjmë thirrje kryeministrit në detyrë dhe gjithë ministrave që, në funksion të zhbllokimit të punës së kuvendit, të dorëzojnë dorëheqjet e tyre formale, siç ua kërkon ligji për qeverinë që është miratuar po nga legjislatura e kaluar, në mënyrë që t’i hapet rrugë konstituimit të Kuvendit dhe të evitohen bllokada të panevojshme,” tha ai.
Cakolli gjithashtu kritikoi mënyrën e menaxhimit të seancës nga kryesuesi Dehari, duke e konsideruar se nuk janë respektuar procedurat parlamentare dhe janë anashkaluar hapat e domosdoshëm ligjorë për vijimin e punës.
“Në radhë të parë, kryesuesi i seancës sot nuk ka pasur fare nevojë që t’i ftojë në konsultim subjektet politike. Ekzistimi i afatit 48 orësh është pikërisht për çështjen e konsultimeve mes subjekteve politike. Unë vlerësoj se në vend që të shkruheshin letra për presidenten, përgjigjet e së cilës veçse dihej – ndonëse unë vlerësoj pozitivisht qasjen e presidentes – besoj që është dashur që të mbaheshin konsultimet e nevojshme në mënyrë që të trajtohej dhe të zgjidhej kjo çështje,” shtoi ai.
Sipas tij, edhe mungesa e një votimi për raportin e komisionit për verifikimin e mandateve ka krijuar vakum juridik dhe ka penguar vijimin e punës parlamentare.
“Zotëri Dehari nuk e administroi seancën siç duhet, sepse në radhë të parë i njëjti nuk shkoi sipas rendit të ditës, e që në këtë rast do të duhej mbledhje edhe një herë e komisionit për verifikimin e mandateve, nxjerrja sërish e një raporti. Sepse raporti i parë nuk është i votuar dhe që i bie që i njëjti më nuk ka asnjë efekt juridik. Dhe që i njëjti të hidhet në votim para deputetëve, sa do që ishte e qartë se nuk janë votat e nevojshme për ta kaluar një raport, për sa kohë që kanë dhënë dorëheqje anëtarët e kabinetit qeveritar,”, tha Cakolli.
