Ministrja në detyrë e Drejtësisë, Albulena Haxhiu, ka reaguar pas dështimit të Kuvendit për të votuar Raportin për verifikimin e mandateve, duke theksuar se partia e saj është e gatshme të ofrojë zgjidhje për tejkalimin e ngërçit politik, por nuk do të pranojë, siç u shpreh ajo, “lojërat e opozitës”, shkruan Ekonomia Online.
“Nuk mund të ketë vendime të njëanshme nga kryesuesi i seancës konstituive. Është e domosdoshme që partitë politike të konsultohen dhe të arrihet një dakordim për rrugën përpara, në mënyrë që të konstituohet Kuvendi i Republikës së Kosovës”, ka deklaruar Haxhiu.
Sipas saj, vetëm nëpërmjet dakordimit të subjekteve politike mund të dilet nga bllokada e shkaktuar nga opozita.
“Nuk ka asnjë parashikim ligjor se çfarë ndodh nëse nuk verifikohen mandatet, prandaj kërkohen propozime konkrete nga partitë politike. Ne jemi të hapur për çdo zgjidhje që çon drejt konstituimit të Kuvendit, por nuk mund të pranojmë kërkesa absurde dhe të pambështetura ligjërisht”, ka shtuar ministrja në detyrë.
Haxhiu kritikoi ashpër qëndrimin e opozitës, duke thënë se ajo po vazhdon me “avazin e vjetër të bllokimit dhe kërkesave të stërvjetëruara për dorëheqje, që janë adresuar me kohë”.
Ajo përfundoi duke thënë se pavarësisht bllokadës, shumica është e vendosur të punojë për zgjidhje institucionale dhe demokratike që çojnë drejt funksionalizimit të Kuvendit.