Një aksident i rëndë komunikacioni ka ndodhur në orët e para të mëngjesit të sotëm në rrugën nacionale Prishtinë–Ferizaj, afër rrethit te KFC-ja në Llapnasell.
Gazeta raportoi se në vetëaksident me pasoja fatale, ka humbur jetën Leonard Avdyli, rreth 30-vjeçar, i cili dyshohet se ishte në timon në momentin kur vetura ka dalë nga rruga.
Gazeta ka siguruar një fotografi të të riut, i cili humbi jetën tragjikisht.
I ndjeri siç merr vesh Gazeta ka pasur nënshtetësi zvicerane, dhe merret vesh se ka jetuar atje.
Për vdekjen e tij kanë njoftuar edhe familjarët, por ende nuk kanë treguar për kohën e varrimit të të ndjerit.
Në veturë ndodhej edhe një pasagjere e cila ka shpëtuar me lëndime dhe është dërguar për trajtim mjekësor.
Automjeti i përfshirë në aksident është një Shkoda, i cili për arsye ende të panjohura ka devijuar nga rruga dhe është aksidentuar rëndë.
Njësia policore ka dalë menjëherë në vendin e ngjarjes, ndërsa hetuesi kujdestar është duke zhvilluar ekzaminimet për të përcaktuar shkakun e aksidentit.
Ndërsa, lajmin për Gazetën e ka konfirmuar edhe zëdhënësja e Policisë për rajonin e Prishtinës, Flora Ahmeti.
“Sot rreth orës 04:30,ka ndodhur një aksident trafiku në rrugën Prishtinë- Ferizaj, ku ka qenë i përfshirë një automjet. Si pasojë e aksidentit lëndime të rënda trupore kanë pësuar dy persona, njëri nga të cilët nuk ka arritë të përballojë plagët dhe i njëjti ka vdekur. Vdekjen e viktimës (mashkull) e ka konstatuar ekipi mjekësor në vendin e ngjarjes”, tha ajo.
Hetimet janë në fazë fillestare dhe autoritetet pritet të publikojnë detaje shtesë në orët në vijim.