Deputeti i Lëvizjes Vetëvendosje, Mefail Bajqinovci, duke iu referuar takimit Kurti- Krasniqi, tha se po diskutohet vetëm të zhbllokohet institucioni i legjislativit. Ky është hapi i parë pastaj për krijimin e qeverisë, raporton Ekonomia Online.
“Shpresoj që të zhbllokohen institucionet, në këtë rast Kuvendi i Kosovës. Kryeministri Kurti i ka dërguar ftesë dy partive opozitare, por po shohim që LDK-ja ka qëndrim kundër. Duke ditur se LDK-ja s’po ka kriter që të takohet me Porfirjen, shovinistin më të madh serb, i cili menjëherë pas takimit me kryetarin e LDK-së shkoi në Rusi, ndërsa s’po ka asnjë mundësi që të takohet me kryeministrin Kurti për të zhbllokuar institucionet. Tashmë ka takim me PDK-në dhe të presim që legjislativi të zhbllokohet dhe të kemi kryetarin e Kuvendit, në këtë rast Albulena Haxhiu… Jo (koalicion qeverisës LVV-PDK). Mendoj se po diskutohet vetëm të zhbllokohet institucioni i legjislativit. Ky është hapi i parë pastaj për krijimin e qeverisë”.
“Nuk e di vetëm dy partive më të madhe opozitare. Një herë i është dërguar ftesa LDK-së më herët dhe PDK-së dje. Por po e shohim që LDK-ja s’po ka dëshirë të takohet dhe lere më të diskutojë për zhbllokimin e institucioneve. Këtu po shihet për çfarë parti institucionaliste e kemi LDK-në, duke ditur se në kohën e Isa Mustafës ka pasur më shumë kundërshtime dhe prapë kemi arritur të kemi një koalicion. Ndërsa sot e kemi një kryetar që nuk dëshiron të takohet me kryeministrin Kurti në asnjë formë”, tha ai.
