Në rrjetet sociale kanë filluar të qarkullojnë video që tregojnë formacione të Ushtrisë Popullore të Kinës duke kryer provat përfundimtare për marshimin në paradën ushtarake që do të mbahet më 9 maj në Sheshin e Kuq në Moskë, me rastin e 80-vjetorit të fitores në Luftën e Dytë Botërore.
Këto pamje konfirmojnë pjesëmarrjen e trupave kineze në ceremoninë e rëndësishme të organizuar nga Kremlini, ndërsa pritet që edhe Presidenti i Kinës, Xi Jinping, të jetë prezent në këtë ngjarje, në një vizitë zyrtare që Kremlini e cilëson me “rëndësi të veçantë”.
Zëdhënësi i Kremlinit, Dmitry Peskov, ka deklaruar për agjencinë shtetërore TASS se “po e presim udhëheqësin e Kinës” dhe se për këtë vizitë janë duke u bërë përgatitje të posaçme.
Parada e 9 Majit në Moskë këtë vit zhvillohet në sfondin e luftës në Ukrainë dhe përpjekjeve të presidentit rus Vladimir Putin për të demonstruar aleancat strategjike të vendit në skenën ndërkombëtare. Ai ka shpallur një armëpushim të përkohshëm me këtë rast dhe ka kërkuar që edhe Ukraina ta respektojë atë. Por, Kievi ka kërkuar një armëpushim të plotë dhe të menjëhershëm.
Presidenti ukrainas Volodymyr Zelensky ka ironizuar paradën, duke thënë se Rusia duhet të shqetësohet për atë që do të shfaqë përballë realitetit të humbjeve në front. Kremlini i ka shpërfillur këto komente.
Pjesëmarrja e formacioneve kineze në këtë paradë shihet si një mesazh i qartë për thellimin e lidhjeve ushtarake dhe politike ndërmjet Pekinit dhe Moskës në një rend botëror gjithnjë e më të polarizuar.