Kryeministri në detyrë, Albin Kurti, ka bërë të ditur se Telekomi i Kosovës ka kaluar nga 50 milionë euro humbje para vitit 2021 në 15 milionë euro fitim gjatë viteve 2023-2024, shkruan Ekonomia Online.
Ai njoftoi gjithashtu fillimin e zgjerimit të rrjetit fiks në gjithë vendin, përfshirë edhe katër komunat në veri.
Sipas tij, investimi përfshin zëvendësimin e teknologjisë nga vendet e pasigurta me atë nga shtetet e BE-së dhe NATO-s, duke garantuar qasje më të mirë në internet, televizion digjital dhe telefon modern.
“Nga operimi me 50 milionë euro humbje para vitit 2021 në atë me 15 milionë euro fitim në dy vitet e fundit 2023-2024, e nga infrastruktura e vjetëruar dhe e lënë në harresë, në investime të qëlluara e përmirësim të shërbimeve për qytetarët.Ky është hovi i ri i zhvillimit të Telekomit të Kosovës që tashmë po e zgjeron edhe rrjetin fiks pas atij mobil. Punimet filluan sot në Fushë Kosovë e në vijim do të shtrihen në çdo qytet, qytezë e fshat, anembanë vendit, përfshirë edhe katër komunat në veri të Ibrit. Përmes këtij investimi Telekomi do të zëvendësojë teknologjinë me origjinë nga vende të pasigurta me teknologji nga shtetet anëtare të Bashkimit Evropian dhe të NATO-s. Gjithashtu secila e secili do të ketë qasje më të lehtë në internet me shpejtësi të lartë, shërbime të avancuara televizive dhe linja moderne telefonike, duke rritur cilësinë e shërbimeve dhe ofruar çmime të përballueshme në treg”, theksoi Kurti.