Policia e Kosovës, në bashkëpunim me Doganën e Kosovës dhe Njësinë për Hetime Rajonale – Lindje të Policisë Kufitare, ka realizuar një operacion të suksesshëm në komunën e Vitisë, pas pranimit të informacioneve të besueshme operative.
Me urdhër të Prokurorit të Prokurorisë Themelore në Gjilan, është kryer kontroll në një depo private, ku janë sekuestruar rreth 7.65 tonë vajra motorike, të dyshuara si të kontrabanduara nga Maqedonia e Veriut, me prejardhje të dyshuar nga Irani. Vlera e përgjithshme e mallrave të sekuestruara llogaritet të jetë mbi 25 mijë euro.
Mallrat janë dërguar në terminalin doganor për procedurat e mëtejshme hetimore dhe administrative. Rasti është duke u trajtuar nga Njësia e Hetimeve Rajonale të Doganës së Kosovës – DRK Lindje, me fokus në identifikimin dhe ndjekjen penale të personave të përfshirë në këtë rrjet të kontrabandës.