Presidenti amerikan, Donald Trump, ka shprehur gatishmërinë për të marrë pjesë në bisedimet për paqe mes Rusisë dhe Ukrainës që pritet të mbahen në Turqi, por vetëm nëse presidenti rus Vladimir Putin do të jetë i pranishëm.
“Unë e di se ai do të donte që unë të isha atje dhe kjo është një mundësi. Nëse do të mund t’i jepnim fund luftës, unë do të mendoja për këtë”, ka thënë Trump.
Komentet e presidentit amerikan u bënë gjatë fluturimit të tij nga Riadi drejt Dohas në Katar, ku foli për mundësinë e përfshirjes së tij në përpjekjet për t’i dhënë fund luftës Rusi-Ukrainë.
Trump tha se nuk është i sigurt nëse homologu i tij rus do të jetë i pranishëm në bisedimet në Stamboll me presidentin ukrainas Volodymyr Zelensky, duke lënë të kuptohet se pjesëmarrja e tij do të varej nga prania e Putinit.
Ndërkohë, është konfirmuar se Sekretari i Shtetit, Marco Rubio, pritet të marrë pjesë në takimin që do të mbahet nesër në Turqi, ka thënë një zyrtar amerikan.