Një shpërthim i fuqishëm ka ndodhur të martën në një fabrikë kimikatesh pranë qytetit të Sevilles në Spanjë, duke shkaktuar shtëllunga të mëdha tymi që alarmuan autoritetet dhe banorët e zonës.
Ngjarja ndodhi në mesditë në një park industrial në Alcala de Guadaira, ku menjëherë pas shpërthimit, shërbimet emergjente ndërhynë për të evakuuar personelin nga objekti. Fatmirësisht, nuk është raportuar për persona të lënduar, sipas agjencisë së lajmeve AP.
Autoritetet ndërmorën masa të menjëhershme duke dërguar mesazhe paralajmëruese për rreth 80,000 banorë të zonës, të cilëve u rekomanduan të qëndrojnë brenda shtëpive, të mbyllin dritaret dhe, nëse është e mundur, të përdorin maska mbrojtëse.