Pas takimit të mbajtur sot ndërmjet presidentes Vjosa Osmani dhe përfaqësuesve të partive politike lidhur me zgjidhjen e krizës politike dhe shpërbërjen e Kuvendit, kryetari i PDK-së, Memli Krasniqi, deklaroi se “nuk ka dalë tym i bardhë”, raporton Ekonomia Online.
Krasniqi tha se ka kërkuar nga kryeministri Albin Kurti që të tërheqë kandidatin aktual për president të vendit dhe të propozojë një figurë konsensuale, por shtoi se nuk pret që një gjë e tillë të ndodhë.
“Në emër të PDK-së, kërkova që kryetari i VV-së, Albin Kurti, ta ndryshojë kandidatin dhe të vijë me një propozim që ka mbështetje. Një gjë e tillë nuk pres që të ndodhë. Duhet ta shohim këtë takim si një hap të parë për të gjetur një rrugëzgjidhje. Kam propozuar që presidentja, në zbatim të përgjegjësive që i ka për të garantuar funksionimin kushtetues të institucioneve, që në një moment kur ajo e vlerëson të nevojshme, t’i drejtohet Gjykatës Kushtetuese, qoftë me një pyetje apo përmes dërgimit të një lënde në Kushtetuese për gjithë procesin zgjedhor. Ne kemi një problem politik. Nuk besoj që ka dalë tym i bardhë”, u shpreh Krasniqi.