Ambasadori britanik në Kosovë, Jonathan Hargreaves, ka thënë se veprimet e fundit të autoriteteve kosovare në veri të vendit e minojnë pretendimin e Kosovës se të gjithë qytetarët e saj janë të mirëpritur e të mbrojtur.
Hargreaves tha se veprimet e javëve të fundit në veri të Kosovës u kanë mohuar fëmijëve dhe qytetarëve të zakonshëm nga komuniteti serb në Kosovë qasjen paqësore në shërbime të përditshme, si klubet sportive.
“Këto veprime minojnë pretendimin e Kosovës se të gjithë qytetarët e saj – pa dallim etnie, gjinie apo përkatësie – janë të mirëpritur dhe të lirë të përfaqësohen, të mbrohen dhe të fuqizohen në Republikën e Kosovës”, ka thënë ai në një OP-ED për Gazetën Express.
Në veri të vendit janë mbyllur disa institucione të strukturave paralele me ndihmën e Policisë së Kosovës.
Për këto ka pasë reagime nga Lista Sprska, partia kryesore e serbëve në Kosovë që mbështetet nga Beogradi, por edhe nga shteti serb.
Për këto veprime ka folur edhe presidenti i Këshillit Europian, Antonio Costa, i cili para pak ditësh qëndroi në Prishtinë.
Duke folur për masat ndëshkuese ndaj Kosovës, të cilat BE i kishte vendosur për shkak të tensioneve në veri të vendit, ai tha përmendi ngjarjet e fundit duke thënë se shpreson të mos jenë “prirje e re, por një përjashtim”.
“Këto masa janë të lidhura me nevojën për të de-përshkallëzuar tensionet në rajon dhe në veri të vendit. Dhe ajo që dëshiroj është që sa më shpejt të kemi këtë de-përshkallëzim, e më pas të mund të ecim përpara dhe t’i heqim këto masa. Shpresoj që ngjarjet e fundit të mos përfaqësojnë një prirje të re, por të jenë përjashtim që konfirmon rregullin se ju jeni plotësisht të angazhuar në këtë rrugë evropiane për të de-përshkallëzuar për t’u angazhuar në këtë dialog mes Beogradit dhe Prishtinës”,kishte thënë ai.