Autoriteti i Konkurrencës i Republikës së Kosovës ka njoftuar se nuk do të marrë pjesë në takimin e thirrur nga Grupi Parlamentar i LDK-së dhe deputetes Hykmete Bajrami, të planifikuar për datën 21 maj 2025, lidhur me çështjen e kalimit të bizneseve në tregun e hapur të energjisë elektrike.
Në njoftim thuhet se vendimi për mospjesëmarrje bazohet në mandatin kushtetues dhe ligjor të institucionit dhe nevojën për të ruajtur pavarësinë dhe paanshmërinë e tij.
Autoriteti rikujton se është agjenci e pavarur që i përgjigjet vetëm Kuvendit të Republikës së Kosovës dhe nuk mund të përfshihet në formate politike apo debate jashtë kornizës zyrtare shtetërore.
Deri në rikthimin e funksionimit të rregullt të Kuvendit, Autoriteti thekson se do të vazhdojë të punojë në mënyrë profesionale dhe të paanshme, duke vepruar brenda mandatit të tij ligjor dhe në funksion të interesit publik.