Në çështjen gjyqësore ndaj Hashim Thaçit, Kadri Veselit, Rexhep Selimit dhe Jakup Krasniqi janë pranuar kërkesat e katër viktimave për të marrë pjesë në proces, ndërsa një tjetër është refuzuar.
Kjo kërkesë është bërë nga dy raporte të Zyrës Administrative të Gjykatës Speciale dhe vendimi është marrë më 15 maj 2025, raporton “Betimi për Drejtësi“.
Sipas zëdhënësit të DhSK-së, Michael Doyle, Rregullorja e DhSK-së u lejon gjyqtarëve të pranojnë kërkesa të paraqitura pas afatit, në rast që ka arsye bindëse.
Kapen mallra të kontrabanduara në Leposaviq gjatë një aktiviteti të përbashkët të Policisë dhe KFOR-it
Aktualisht numri i viktimave pjesëmarrëse në këtë rast është 156.
Po ashtu, Doyle foli edhe për pranimin me shkrim të dëshmisë së katër dëshmitarëve sipas Rregullës 155. Ai tregoi që është refuzuar kërkesa për dëshminë e një dëshmitari tjetër, për çka “Betimi për Drejtësi” ka raportuar se bëhet fjalë për dëshmitarin e 29-të në këtë rast, i cili në tetor të 2023-ës kishte refuzuar të dëshmojë.
Ndërsa, në çështjen gjyqësore ndaj Hashim Thaçit, Bashkim Smakajt, Fadil Fazliut, Isni Kilajt dhe Hajredin Kuçit, Doyle tha se gjykatësja e procedurës paraprake zgjati afatin për Prokurorinë për t’iu përgjigjur mocioneve paraprake të mbrojtjes në atë çështje. Tha se në këtë rast deri më tani janë dorëzuar pesë mocione paraprake.
Veç kësaj, Doyle përmendi edhe seancat e Apelit ndaj Pjetër Shalës, në të cilat mbrojtja kishte kërkuar që vendimi për dënimin ndaj klientit të tyre të rrëzohet dhe që Shala të shpallet i pafajshëm.
Po ashtu, në këtë rast, Prokuroria ka argumentuar se apelimi i Shalës duhet të hudhet poshtë në tërësi.
Ndryshe, Dhomat e Specializuara të Kosovës në Hagë, çdo të enjte, në orën 14:30, përmes platformës online “Zoom” mbajnë informim javor ku ofrojnë informacione të përditësuara mbi zhvillimet e fundit lidhur me procedurat gjyqësore dhe veprimtaritë në këtë gjykatë.