Kreu i AAK-së, Ramush Haradinaj, pas dështimit të seancës së sotme të Kuvendit është pyetur nëse do të votonte Fatmir Limajn kryeparlamentar, Haradinaj për partnerin e tij të koalicionit në këto zgjedhje tha se është “e shkuar e harruar”, raporton Ekonomia Online.
“Nuk kam koment. E kam thënë edhe më parë: e shkuar e harruar, gati se nuk ekziston emri i tij as për diskutime as për tema të tilla” tha Haradinaj për mediat.
Ai shprehu shqetësim për situatën në vend, duke paralajmëruar pasoja serioze ekonomike nga mosfunksionimi i institucioneve, përfshirë ndikimin në prodhimtari dhe vende pune.
“Ndryshe nuk po dimë çka me bo për besë. Por, kemi përmend tre emra. Nëse njëri prej tyre kandidohet, e votojmë. Shqetësim serioz, jo veç për faktin që fillojnë tarifat e reja të energjisë. Nuk është vetëm keqpërdorim i një situate kjo, por janë të rrezikuar shumë vende të punës në prodhim. Pra, një rënie e madhe e prodhimtarisë edhe punës në prodhim, paraja do të eksportohet, pasojat do të jenë shumë më të mëdha në vend. Kjo është një temë, por ka shumë të tilla”, tha ai.
