Polonia do të mbajë një balotazh presidencial të dielën midis dy kandidatëve që ofrojnë vizione krejtësisht të ndryshme për të ardhmen e vendit.
Fituesi do të pasojë presidentin Andrzej Duda, një konservator i cili po përfundon mandatin e tij të dytë dhe të fundit.
Rezultati do të përcaktojë nëse Polonia do të përqafojë një trajektore populiste nacionaliste apo do të orientohet më plotësisht drejt politikave liberale dhe pro-evropiane.
Një sondazh nga Ipsos do të publikohet kur të mbyllen qendrat e votimit të dielën në orën 21:00 të mbrëmjes sipas orës lokale, me një diferencë gabimi prej plus ose minus 2 pikë përqindjeje. Rezultatet përfundimtare priten të hënën, raporton Associated Press, transmeton Klankosova.tv.
Kushdo që fiton do të ndihmojë ose të pengojë agjendën e qeverisë qendrore të kryeministrit Donald Tusk falë fuqisë presidenciale për të vënë veton mbi ligjet.
Votimi vjen mes tensioneve të larta rajonale të nxitura nga lufta e Rusisë në Ukrainën fqinje, shqetësimeve për sigurinë në të gjithë Evropën dhe debateve të brendshme rreth sundimit të ligjit.
Ai poashtu vjen pas një raundi të parë më 18 maj, në të cilin kryetari i bashkisë së Varshavës, Rafał Trzaskowski, fitoi më shumë se 31% të votave dhe Karol Naërocki, një historian konservator, fitoi gati 30%. Njëmbëdhjetë kandidatë të tjerë u eliminuan.
Sondazhet e opinionit tregojnë se të dy burrat janë në garë kokë më kokë.