Deputeti i Lëvizjes Vetëvendosje, Artan Abrashi, kritikoi opozitën pas dështimit të radhës të seancës plenare, duke e quajtur këtë si vazhdim të bllokadës politike, raporton Ekonomia Online.
Ai tha se paralizimi i institucioneve nuk është në interes të Kosovës dhe se mungon reflektimi nga ana e opozitës.
Abrashi shtoi se nuk ka qenë asnjëherë problem emri i Albulena Haxhiut, ndërsa u shpreh i habitur që lideri i LDK-së, Lumir Abdixhiku, pret pajtim për çështje të mëdha, kur nuk ka gatishmëri as për votimin e një komisioni me votim të fshehtë.
“Fatkeqësisht edhe sot ishim dëshmitarë të vazhdimit bllokues. Një qasje e tillë është duke krijuar pasoja dhe se paralizimi i jetës institicionale nuk është gjë që i duhet Kosovës. Nuk ka reflektim. Ne e kemi diskutuar atë që quhet plan dhe në diskutimet tona lidhur me pikat kemi arritur në përfundim që si mund të pres Abdixhiku që mund të pajtohemi për 15 gjëra kaq të mëdha ndërkohë që nuk kemi pajtueshmëri për votimin e një komisioni për votim te fshehtë. Pyetja që shtrohet ku po e sheh rrezikun e tillë në Kosovë. Nëse e sheh Serbinë rrezik pse nuk morën pjesë në takim konsultativ të Kurtit. Që prej fillimit deri sot kurrë nuk ka qenë dhe nuk është problem emri i Albulena Haxhiut”, tha ai.
