Korporata Energjetike e Kosovës (KEK sh.a.) ka njoftuar se aktualisht po prodhon rreth 400 megavat energji në orë (MW/h) përmes dy njësive aktive: njësia B1 në Termocentralin “Kosova B” dhe njësia A5 në Termocentralin “Kosova A”.
Sipas të dhënave zyrtare, prodhimi ditor i KEK-ut arrin në 8208 megavat orë (MWh), që përfaqëson rreth 83% të kërkesës totale të deklaruar nga KESCO për Furnizuesin e Shërbimit Universal (FSHU), e cila këtë javë është 9856 MWh.
Ndërkohë, në njësinë B2 të Termocentralit “Kosova B” është duke u zbatuar një projekt kapital për rehabilitimin e turbinave, me vlerë mbi 56 milionë euro – investimi më i madh në këtë termocentral në më shumë se 40 vjet.
KEK ka njoftuar gjithashtu se ekipet profesionale janë duke punuar pandërprerë për rikthimin në funksion të një njësie tjetër në Termocentralin “Kosova A”, në ditët në vijim. Ky veprim synon të rrisë më tej sigurinë dhe qëndrueshmërinë e furnizimit me energji elektrike për qytetarët dhe ekonominë e vendit.
KEK rithekson përkushtimin për një furnizim stabil dhe të pandërprerë me energji, si dhe vazhdimin e investimeve në përmirësimin e kapaciteteve prodhuese dhe efikasitetin energjetik.