Një burrë është arrestuar në Vushtrri nën dyshimin për marrje apo mbajtje të kundërligjshme të fëmijës dhe armëmbajtje pa leje.
“Rreth orës 14:30, policia ka ndërhyrë pas një denoncimi se i dyshuari, një burrë kosovar në këtë rast gjyshi i vajzës, kishte tentuar ta merrte me forcë mbesën e tij, vajzën e djalit, për t’u përkujdesur për të, pavarësisht kundërshtimit të nënës së fëmijës”, thuhet në raportin e policisë, njofton Klankosova.tv.
Gjatë bastisjes në shtëpinë e të dyshuarit, policia ka gjetur dhe konfiskuar një pistoletë dhe një pushkë ajrore, për të cilat i dyshuari nuk posedonte leje.
Me urdhër të prokurorit, pas intervistimit, i dyshuari është dërguar në mbajtje.
“Rasti po trajtohet nga organet kompetente’, thuhet tutje në raportin 24-orësh të policisë.