Kryeministri në detyrë i Republikës së Kosovës, Albin Kurti, në emisionin “Këndi i debatit” në Tëvë1 ka deklaruar se takimi me Presidenten Vjosa Osmani ka qenë i hapur dhe i përqendruar në diskutimin e krizës aktuale politike që po e mban vendin në një situatë të bllokuar që prej 19 prillit.
“Takimi me Vjosën ka shkuar mirë në kuptimin që i diskutuam të gjitha temat dhe elementet përbërëse të situatës aktuale, e cila është ajo e moskonstituimit të Kuvendit të Republikës së Kosovës që nga 19 prilli. Është një konstatim i përbashkët senuk kemi më shumë se tre javë kohë. Më herët është më mirë, më vonë nuk bën. Ashtu e thotë edhe aktgjykimi i Gjykatës Kushtetuese – deri në fund të korrikut duhet të jetë gjithçka e kryer. Presidentja ka shprehur brengat e saj”, u shpreh Kurti.
Ai gjithashtu foli për takimet me liderët e partive politike, duke thënë se vetëm Lëvizja Vetëvendosje ka lëvizur konkretisht në drejtim të zgjidhjes.Ne jemi të vetmit që kemi lëvizur. Të nesërmen kanë qenë Glauk Konjufca dhe Albulena Haxhiu në takime. Znj. Haxhiu ka deklaruar se për të nuk ka nevojë të votohet dy herë, sepse nuk është kandidate. Në takimin e së shtunës kam ftuar që të merremi vesh për një pako për përbërjen e Kryesisë së Kuvendit. Nëse nuk e doni votimin e fshehtë, dërgoni përfaqësuesit tuaj dhe kthehemi te vota e hapur”, tha ai.
Kurti theksoi se ka një farë shprese për zgjidhjen e situatës, por jo shumë, duke kritikuar qasjen e opozitës ndaj aktgjykimit të Gjykatës Kushtetuese.Unë kam shpresë, por nuk mund të them që kam shumë shpresë, për shkak të leximeve shumë të ndryshme që po i bëhen aktgjykimit të Gjykatës Kushtetuese. Janë lexime të gabuara nga ana e tyre”, përfundoi Kurti.