Menaxheri i departamentit meteorologjik në KANS, Sherif Gosalci ka bërë të ditur se ditëve në vijim pritet përsëri ngritje graduale e vlerave dhe valë e radhës së të nxehtit.
Gosalci përmes një postimi në Facebook tha se në mesin e javës së ardhshme do të ketë temperatura maksimale deri në 40 gradë Celsius.
“Pas ndryshimit të motit, shoqëruar me stuhi lokale rrebeshesh shiu e rënie temperaturash, ditëve në vijim pritet përsëri ngritje graduale e vlerave dhe valë e radhës së të nxehtit, që pritet të kulmojë në mesin e javës së ardhshme, madje me temperatura maksimale deri në 40°C dhe netë tropikale (minimale mbi 20°C)”.
“Kjo valë mund të shënojë kulminacionin e ekstremeve të kësaj vere në vendin tonë. Freskim me reshje të dobëta dhe rënie e lehtë e temperaturave nga data 25 korrik”, ka shkruar tutje ai.