Kryetari i Aleancës për Ardhmërinë e Kosovës, Ramush Haradinaj, ka kujtuar 15-vjetorin e vendimit historik të Gjykatës Ndërkombëtare të Drejtësisë, e cila më 22 Korrik 2010 legjitimoi shpalljen e Pavarësisë së Kosovës.
Haradinaj thekson se ky vendim është një nga ngjarjet më të rëndësishme në historinë e shtetformimit dhe shtetndërtimit të Kosovës, duke e cilësuar si vulën e drejtësisë ndërkombëtare mbi përpjekjet historike të popullit tonë për liri.
Ai ka bërë thirrje për unitet dhe përkushtim ndaj rrugës euro-atlantike, duke theksuar se “Kosova ia ka borxh vetes që të qëndrojë krah vlerave perëndimore, përkrah miqve dhe aleatëve, në krye me Shtetet e Bashkuara të Amerikës”.