Anëtarja e Partisë Demokratike të Kosovës (PDK), Besa Ismaili, ka reaguar ashpër ndaj deklaratës së kryeministrit në detyrë Albin Kurti për kërkesën e tij për 500 mijë vota gjatë zgjedhjeve të fundit, duke e cilësuar këtë si kërkesë për “pushtet absolut” dhe jo për legjitimitet demokratik.
“Nuk është hera e parë që Kurti kërkon 500 mijë vota, dhe nuk do të jetë as e fundit,” tha Ismaili. “Por ajo që kërkon në të vërtetë nuk është besimi i qytetarëve – është dorëzimi i tyre. Është kërkesë për nënshtrim, për gojëmbyllje.”
Ismaili kritikoi ashpër arrestimin e qytetarëve për deklarime kundër pushtetit, duke thënë se “kur dikush arrestohet vetëm pse e quan një eksponente të qeverisë ‘hajn’, kjo nuk është demokraci, kjo është autokraci.”
Sipas saj, Kurti po tenton të ndërtojë një sistem ku kritika ndëshkohet dhe liria e fjalës shtypet. “Dikur ishte luftëtar për fjalën e lirë. Sot është ai që urdhëron pranga për ata që guxojnë të flasin,” tha Ismaili.
Ajo paralajmëroi për rrezikun e një autokracie që “nuk vjen me tanke, por me një votë të dhënë nga frika ose mashtrimi.” Ismaili theksoi se qytetari që e quan qeverinë “hajn” nuk është kriminel, por themel i demokracisë.
“500 mijë vota për një pushtet që nuk punon, që nuk e duron kritikën, që nuk e njeh shtetin – janë vota për izolim, për betonim të një regjimi që do heshtje, jo zgjidhje,” përfundoi Ismaili.