Presidenti amerikan Donald Trump planifikon të zhvillojë takime të ndara me presidentin e Rusisë, Vladimir Putin, dhe presidentin e Ukrainës, Volodymyr Zelensky, që nga java e ardhshme, raportoi të mërkurën gazeta New York Times, duke iu referuar burimeve pranë zhvillimeve diplomatike.Takimet do të jenë të njëpasnjëshme dhe kanë për qëllim përshpejtimin e përpjekjeve për t’i dhënë fund luftës në Ukrainë.Kujtojmë se më herët gjatë javës, i dërguari special i Trump, Steve Witkoff, zhvilloi një takim të cilësuar si “jashtëzakonisht produktiv” me presidentin rus Vladimir Putin në Kremlin. Pas këtij takimi, Trump pati një bisedë telefonike me Zelenskyn dhe më pas informoi aleatët evropianë për zhvillimet më të fundit.
Këto lëvizje vijnë në një moment kyç, kur diplomacia ndërkombëtare është intensifikuar në përpjekje për një zgjidhje të qëndrueshme të konfliktit ruso-ukrainas, ndërsa Shtëpia e Bardhë ka sinjalizuar gjithashtu vendosjen e mundshme të sanksioneve të reja ndaj Rusisë./Panorama.com