Kryeministri në detyrë, Albin Kurti, ka njoftuar përmes një postimi në Facebook se është realizuar rruga alternative për Stubëll, nga rruga “Anton Çeta” deri te rruga “Sejdiu”, një nga katër projektet infrastrukturore që Ministria e Mjedisit, Planifikimit Hapësinor dhe Infrastrukturës ka përfunduar ose është në realizim në komunën e Vitisë.
Kurti ka bërë të ditur se vlera e investimit për këtë rrugë është 822,858 euro, ndërsa totali i investimeve në infrastrukturë rrugore në komunën e Vitisë, gjatë këtij mandati qeverisës, ka kaluar mbi 8 milionë euro. Ai ka theksuar se kjo rrugë e bën më të lehtë dhe më të sigurt qarkullimin e banorëve të Stubëllit dhe fshatrave përreth, si dhe të vizitorëve që vijnë për vlerat historike e kulturore që ka ky fshat, ku ndodhet edhe shkolla e parë shqipe në Kosovë dhe objekte të tjera të trashëgimisë kulturore.