Shpat Kasapi, i ftuar në emisionin “Weekend” në Klan Kosova, foli edhe njëherë për një ndër tematikat më të diskutuara rishtazi në medie: “Dhunën” e ushtruar ndaj tij në një dasmë ku ishte i ftuar si këngëtar.
Ndonëse Shpati e ka saktësuar se nuk u dhunua dhe se është “si kokrra e mollës”, sërish nuk përtoi të sqaronte se ç’ndodhi në dasmë.
“U bë bujë e madhe, u rrah Shpati, u rrahën dasmorët. Jam nisur pak me vonesë sepse ka pasur trafik. Kur mbërrita, dasmori më tha: “Shpat je vonuar, por këndo”. Unë i thashë se “do të këndoj më shumë tani sepse jam vonuar” dhe ai ishte i agravuar, normal”, u shpreh fillimisht këngëtari.
Më tej, ai sqaroi se pati kontradikta për çështjen e pagesës:
“Në fund të dasmës ishte puna e pagesës. Më thanë: ‘Ti s’ke kënduar, s’do e marrësh pagesën”. Unë pak u agravova, ata u agravuan, u bë një debat i vogël dhe kaq ka qenë. Askush nuk më ka prekur, as nuk më ka ngacmuar”, tha ai.
Lajmet se Shpati ishte dhunuar brutalisht dhe pretendimi se ai kishte shkuar i dehur në dasmë morën dhenë nëpër portale të ndryshme. Vetë Shpati publikoi një foto, si për të treguar se nuk kishte asnjë shenjë nga “rrahja brutale”, duke treguar se ishte mirë dhe se lajmi ishte ekzagjëruar.