Banorët e fshatrave të Vushtrrisë, konkretisht Brusniku, Kolla por edhe shumë të tjera, për shkak të prishjeve të shpeshta e të pazakonshme po mbesin pa ujë të pijës me javë të tëra.
Së fundmi, banorët e fshatit Brusnik, por edhe Kolla tashmë po ballafaqohen me një problem të pazakontë që as në vendet aziatike nuk ndodh.
Prishtjet e vazhdueshme të njëpasnjëshme, në baza ditore po shkaktohen në Brusnik, në dy lagje të fshatit, e që fatkeqësisht po ndodhë për shkak të moskryerjes së punimeve në rregull nga kompania e cila ka fituar tenderë e marrin para për kryerjen e punimeve, por nga neglizhenca e tyre, sidomos e KRU Mitrovicës dhe degës së saj në Vushtrri, banorët po mbesin pa ujë me javë të tëra.
Shiheni këtë foto, ku shihet shpërthimi i ujit, ndërsa KRU Mitrovica, si dhe dega e saj në Vushtrri, madje as kompania e cila e mirëmbanë këtë nuk ja dalin për javë të tëra që ta rregullojnë.
Kjo është skandaloze, një prishje aq e vogël, të zgjatë me javë të tëra për sanim, është mjerim, është tmerrim, është shkatërrim për banorët të cilët ballafaqohen me këtë problem tash e gjashtë muaj.
Duhet theksuar se secila shtëpi, në këto fshatra ka dhënë 80 euro, në mënyrë që të përshpejtohet procesi i lëshimit të ujit, por a ia ka vlejtur të paguajnë para qytetarët, ndërsa KRU Mitrovica, dega e saj në Vushtrri dhe kompania mirëmbajtëse të mos reagojnë në sanimin e dëmëve.
Gjithashtu, duhet theksuar, e në bazë të informacioneve të besueshme, kompanitë në fjalë, në kohën kur janë shtri gypat kryesor, kanë vendosur gypa, lidhëse dhe pajisje të tjera të cilat nuk e përballojnë aspak shtypjen e ujit. Thënë më shqip, kanë vendosur gypa jashtë standardeve.
Një fakt tjetër shumë i rëndësishëm është se, edhe lidhëset adekuate, pajisjet tjera përcjellëse ishin vendosur nga më të lirat që gjenden në treg, e kjo ka shkaktuar probleme të mëdha tek banorët.
Përshkak të shtypjes së madhe të ujit, secila shtëpi në këto fshatra, sidomos në gjashtë muajit e fundit, është dëmtuar me më së paku 500 euro.
Për këtë janë në dijeni Komuna e Vushtrrisë, KRU Mitrovica, dega e saj në Vushtrri por edhe kompania e cila është duke e “mirëmbajtë” rrjetin e ujit, por si duket, asnjë prej këtyre nuk e ka të rëndësishëm qytetarin, por vetëm përfitimet e tyre materiale, ngase, faturat e ujit, përfundojnë në duartë e qytetarëve muaj për muaj!