Reali i Madridit regjistroi fitoren e tretë radhazi në La Liga, teksa mposhti me përmbysje 2 me 1 Majorkën e Marash Kumbullës dhe Vedat Muriqit, në një duel që rezultoi tepër emocionues.
Mbape gjeti rrugën e rrjetës në minutën e 7-të, por goli u anulua për pozicion jashtë loje. Ndërkohë që në minutën e 18-të, skenën e “Bernabeut” e rrëmbeu Vedat Muriqi, i cili do të kalonte në epërsi miqtë, me një goditje të saktë me kokë.
Por goli i shqiptarit të Kosovës, nuk mjaftoi që Majorka të bënte surprizën mbrëmjen e djeshme, teksa në harkun kohor të 1 minute, më konkretisht në minutat 37 dhe 38, madrilenët shënuan 2 herë me Gyler dhe Vinicius Zhunior, duke përmbysur shifrat.
Në fundin e pjesës së parë, Reali shënoi një tjetër gol me Mbape, i cili sërish u anulua për pozicion jashtë loje.
Edhe në minutën e 55-të të sfidës, pati një tjetër gol të anuluar për skuadrën e Ksabi Alonsos, teksa kësaj here ishte Gyler që shënoi pas prekjes së topit me dorë.
Për sa i përket Marash Kumbullës, ai u aktivizua titullar, duke qëndruar në fushë gjatë gjithë duelit, njësoj si Muriqi. Të dy futbollistët shqiptarë bënë një paraqitje pozitive.
FT: REAL MADRID – MAJORKA 2-1
Gyler 37′, Vinicius Zhunior 38′ / Muriqi 18′