Më shumë se një mijë automjete ushtarake gjermane kanë mbërritur në Lituani për stërvitje të mëdha në krahun lindor të NATO-s, sipas mediave gjermane.
Dy anije mallrash transportuan automjete luftarake, automjete të blinduara, kamionë ushtarakë dhe pajisje e personel të tjerë nga porti gjerman Rostok përtej Detit Baltik në Lituani, një anëtare e Bashkimit Evropian dhe NATO-s, transmeton KosovaPress.
Pas mbërritjes në portin Klaipeda, konvoji i Brigadës së 37-të të Këmbësorisë së Blinduar u drejtua për në Pabrade dhe baza të tjera ushtarake lituaneze, tha sot një zëdhënës i ushtrisë gjermane.
Trupat dhe automjetet do të marrin pjesë në stërvitjet Quadriga 2025, të përqendruara në mbrojtjen e rajonit Baltik në kushte krize dhe lufte.
Lituania kufizohet me enklavën ruse Kaliningrad dhe aleatin e Rusisë – Bjellorusinë.