Lidhja Demokratike e Kosovës ka kundërshtuar vendimin e Qeverisë në detyrë për të dërguar Besnik Bislimin në Bruksel në kuadër të dialogut me Serbinë, duke e konsideruar pa legjitimitet qytetar dhe institucional.
Sipas LDK-së, dialogu është proces vendimtar që duhet të udhëhiqet nga institucione të dala nga zgjedhjet dhe jo nga një qeveri në detyrë pa mandat.
“Lidhja Demokratike e Kosovës vlerëson se vendimi i Qeverisë në detyrë për ta dërguar z. Besnik Bislimi në Bruksel, në kuadër të dialogut me Serbinë është i pajustifikuar dhe pa asnjë legjitimitet qytetar e institucional. Zgjedhjet e 9 shkurtit dhanë një mesazh të qartë nga qytetarët e Republikës së Kosovës. Ky vullnet politik nuk i jep mandat z. Bislimit të përfaqësojë Kosovën në një proces kaq të rëndësishëm dhe vendimtar”, thuhet në reagimin e LDK-së.
Sipas LDK-së vendime të tilla dëmtojnë kredibilitetin ndërkombëtar të Kosovës dhe cenojnë rrugën euroatlantike të vendit.
LDK ka theksuar nevojën për përfaqësim të denjë, të fuqishëm dhe legjitim në këtë proces.
“Përfaqësimi në dialog mund të bazohet vetëm mbi institucione legjitime të dala nga zgjedhjet dhe të mbështetura nga sovrani. Dialogu me Serbinë është proces i ndjeshëm që përcakton të ardhmen e shtetit tonë. Ky proces nuk mund të reduktohet në vendime të njëanshme të një qeverie në detyrë, e cila nuk gëzon më besimin qytetar dhe as shumicën e nevojshme për të marrë përgjegjësi të këtij niveli. Veprime të tilla dëmtojnë kredibilitetin ndërkombëtar të Kosovës dhe rrezikojnë ta cenojnë rrugën tonë euroatlantike. Kosova ka nevojë për përfaqësim të denjë, të fuqishëm dhe mbi të gjitha legjitim. Lidhja Demokratike e Kosovës do të mbrojë me vendosmëri këtë parim, duke theksuar se dialogu nuk mund të udhëhiqet nga improvizime partiake të një qeverie pa mandat”, thuhet në reagim.