Kandidati për kryetar të Komunës së Suharekës, Bali Muharremaj, gjatë një vizite në fshatin Nepërbisht, ka shprehur mbështetjen e tij për bujqësinë dhe prodhimin vendor, duke vlerësuar lart punën e fermerit Ramadan Shala dhe fermën e tij të pulave bio “Tram”.
“Ferma ‘Tram’ është një model i suksesit që duhet ndjekur. Fermeri Ramadan Shala po dëshmon se me përkushtim dhe punë të ndershme, bujqësia dhe veçanërisht prodhimi bio kanë të ardhme në Suharekë,” u shpreh Muharremaj.
Ai theksoi se zhvillimi rural dhe mbështetja për fermerët do të jenë prioritet kyç në mandatin e tij, duke u angazhuar për politika që fuqizojnë ekonominë lokale dhe sigurojnë kushte më të mira për prodhuesit.
Ferma “Tram” njihet për prodhimin e vezëve dhe mishit të pulave me standarde të larta bio, dhe tashmë është bërë një pikë referimi për bujqësinë e qëndrueshme në rajon.