Kryetari i Rahovecit dhe kandidati i AAK-së, Smajl Latifi, ka vizituar sot Kooperativën Bujqësore “Krusha”, ku u prit nga znj. Fahrije Hoti, udhëheqësja e kësaj kooperative dhe shembull frymëzues i fuqisë dhe punës së grave në bujqësi.
Latifi u njoh me sukseset e kooperativës, e cila prodhon kryesisht perime të konservuara, të cilat tashmë eksportohen në Evropë dhe Shtetet e Bashkuara të Amerikës. Afërsisht 80% e prodhimit shkon për eksport, ndërsa 20% mbetet për tregun vendor. Kooperativa punëson rreth 50 punëtorë, prej të cilëve 15 janë sezonalë.
Ai vlerësoi punën e palodhur dhe sakrificat e grave që e kanë ndërtuar këtë biznes dhe theksoi se KB “Krusha” është një shembull frymëzues i suksesit dhe optimizmit për të ardhmen e Rahovecit dhe zonës rurale.
“Ju uroj suksese të mëtejshme dhe ju falënderoj për pritjen e ngrohtë”, tha Latifi, duke nënvizuar rëndësinë e mbështetjes për bizneset vendore dhe iniciativat e grave.