Kandidati i AAK-së për kryetar të Komunës së Rahovecit, Smajl Latifi, ka vizituar dy blegtorë të dalluar në fshatin Bërtatin, Nuhi Gashin dhe Baki Gashin, të cilët merren me mbarështimin e buallicave dhe lopëve.
Latifi vlerësoi punën e tyre të palodhshme, duke theksuar se Komuna e Rahovecit ka qenë dhe do të mbetet partner i fuqishëm i bujqve dhe blegtorëve.
“Nuhiu është i vetmi në komunën tonë që mbarështon buallicën. Aktualisht ai ka 14 krerë, prej të cilave 6 janë qumështore, ndërsa merret edhe me kultivimin e perimeve. Ndërkohë, Bakiu ka arritur të zgjerojë veprimtarinë me 91 krerë lopë, prej tyre 52 qumështore, duke prodhuar mbi 1,000 litra qumësht në ditë. Ai po ashtu mbjell rreth 40 hektarë misër e grurë dhe planifikon të ndërtojë stallë të re”, tha Latifi.
Ai premtoi mbështetje të plotë për zhvillimin e mëtejmë të aktiviteteve blegtorale dhe bujqësore, duke theksuar se komuna do të qëndrojë gjithmonë pranë bujkut, punëtorit dhe qytetarit.