Në shkollën “Gëzim Hamza – Piktori” u shënua dita e shkollës dhe ditëlindja e dëshmorit të kombit, Gëzim Hamza, me një ceremoni të mbushur me emocion, krenari dhe program kulturor e artistik.
Në këtë ditë të veçantë morën pjesë nxënës, mësimdhënës, prindër, familjarë të dëshmorëve, kolegë nga komuna dhe qytetarë të Rahovecit, të cilët së bashku festuan dhe kujtuan veprën e pavdekshme të heroit.
Kandidati për kryetar të Komunës së Rahovecit nga Aleanca për Ardhmërinë e Kosovës (AAK), Smajl Latifi, u shpreh se Gëzim Hamza ishte jo vetëm luftëtar i madh, por edhe artist i dalluar, që dha jetën për lirinë e kombit tonë.
“Sot ai është frymëzim atdhedashurie për të rinjtë dhe për të gjithë qytetarët tanë. Gëzuar ditën e shkollës dhe lavdi e nderime përjetë dëshmorit të kombit, Gëzim Hamza – Piktori, si dhe të gjithë dëshmorëve e heronjve të kombit!”, theksoi Latifi.