Me dhimbje është pritur lajmi për ndarjen nga jeta të analistit dhe publicistit të njohur nga Shkupi, Agim Jonuz, një prej figurave më të spikatura të opinionit publik në Maqedoninë e Veriut.
Sipas burimeve familjare, Jonuz ndërroi jetë pas një sëmundjeje të shkurtër, pas disa ditësh qëndrimi në spital.
Agim Jonuz njihej për analizat e tij të mprehta dhe komentet e drejtpërdrejta mbi zhvillimet politike, shoqërore dhe ndëretnike në vend. Ai ishte shpesh i ftuar në debate televizive dhe vlerësohej për qasjen e hapur dhe argumentimin e guximshëm.
Gjatë karrierës, Jonuz kishte ushtruar edhe funksione publike, përfshirë atë të zëdhënësit të Qeverisë, dhe ishte aktiv në gazetari dhe publicistikë.
Lajmi për vdekjen e tij ka prekur shumë kolegë, gazetarë dhe figura publike, të cilët kanë shprehur ngushëllime të thella për familjen e tij, duke e cilësuar Jonuzin si “një zë të veçantë që do t’i mungojë medias dhe debatit publik”.
Ceremonia e varrimit pritet të mbahet nesër në varrezat e Butelit në Shkup.