Pas propozimit të Albin Kurtit, për ta emëruar ministër për Familje dhe Mirëqenie Sociale, Andin Hoti, ka folur hapur për bindjet e tij.
Ai thotë se disa reagime që ka marrë kohët e fundit i kanë shkaktuar ndjenja të thella.
“Deri sot kam pas respekt për ty si djalë i Ukshin Hotit, por prej sot jo më”, ose “E korite emrin e babës”, janë fjalë që nuk tregojnë shqetësim për idealin, por hipokrizi.
Hoti shton: “Është e neveritshme kur dikush e lidh respektin ndaj një njeriu me bindjen e vet politike. Pra, unë paskam qenë ‘i mirë’ sa kohë mendoja si ti, dhe ‘i keq’ sapo mendova vetë.”
Ai kujton edhe sfidat e familjes së tij pas luftës dhe sakrificat që kanë bërë: “Para pak ditësh, një mik më tha: ‘Andin, kujtoji të gjithë ata dashamirë të Ukshinit, kur ti s’ishe fytyrë publike.’”
Hoti thekson se askush nuk mund t’i imponojë bindjen e tij: “As ju, as askush tjetër, nuk ma imponon bindjen. Nuk e shes, nuk e ndërroj dhe nuk e negocioj.”
Ai shton: “Unë jam aty ku dua të jem, ku e shoh të drejtë të jem, ku mendoj se mund të jap kontributin tim për vendin”.
Në fund, ai shpreh dhimbjen për respektin e rremë që ka marrë: “E vetmja herë që jam mashtruar, është kur kam menduar se disa më kanë respektuar për atë se kush jam, e jo për bindjen politike që unë kam pasur”.