Deputetja e PDK-së, Blerta Deliu ka reaguar ndaj deklaratës së kryeministrit në detyrë, Albin Kurti i cili sot në 5-vjetorin e arrestimit të ish-krerëve të UÇK-së që po mbahen në Hagë, bëri thirrje për lirimin e tyre dhe tha se “është e drejtë që ata të kthehen në shtëpi e ta mbrojnë në liri luftën çlirimtare”.
Deliu e ka quajtur reagimin e Kurtit hipokrizi elektorale, duke thënë se për pesë vjet ai ka heshtur dhe ka penguar mbështetjen institucionale për ish-krerët e UÇK-së.
“Pesë vjet heshtje, pesë vjet pengesa për financa e mungesë vullneti institucional. Asnjë vizitë, asnjë përpjekje reale për t’i dalë në krah krerëve të UÇK-së në Hagë. Tani, kur proceset po afrohen drejt fundit, Albin Kurti publikon një letër të vitit 2022 që s’paska prodhu asgjë e as sot s’ka kurrfarë relevance. Ka vetëm qëllimin e efektit elektoral pak para zgjedhjeve. Asgjë më shumë”, ka shkruar Deliu.